بيان اتحاد جروبات الفيس بوك منظمة شباب الوحدة الوطنية رقمــ(3)ـــ
السلام عليكم ورحمة الله وبركاته
هذه المبادرة من مجموعة من الشباب الذين لا يمثلون اي تيار سياسي او ممن خلعو ثوب الاحزاب
حيث استلهمنا خطوتنا هذه بعد النجاح الساحق للشباب العربي في الوطن العربي، مستخدمين اسلوب النضال السلمي الذي هز العالم وحركهم لاتخاذ المواقف المساندة لهم.
الفكرة عبارة عن محاكاة لميدان التحرير في مراكز المدن الفلسطينية ، وحشد الجميع للاقامة باعتصام طويل الامد حتى نهاية حالة الانقسام .
معيار النجاح في هذا التحرك هو الجماهير المتركزة امام الموقع المذكور وتحفيز وسائل الاعلام لنقل الحدث مباشرة الى تلفزيونات العالم. لتصل الى العالم اجمع .
ايمانك بامكانية تحقيق هذا الهدف هو ما يخلق العزيمة، ويوصلنا الى الهدف.
رسالة للي بيهمه وطننا فلسطين...هاي الرسالة مش من حدا معين، هاي الرسالة هي صوتي وصوتك وصوت الشعب كله...
والدعوة اللي فيها بتعبر عن كل واحد فينا، واذ اقتنعت بالتحرك الشعبي لانهاء الانقسام ... حضر حالك للموعد القريب لتحقيق اهدافنا
يلي أمنت بقدرة الشباب على التغيير، يلي شفت بعنيك انه ممكن تتحقق أحلام الشعوب، يلي وصلتك الرسالة من تونس ومصر انه الشعب هو صاحب الحق بالتغيير... صار وقت نقوم، عشان ننهي الانقسام و نفكر مع بعض كيف ننهي الاحتلال ايد وحدة و نبني دولتنا اللي بنحلم فيها مهما كان انتمائنا ... لانه ببساطة احنا انتمائنا الاول لفلسطين...
... تعالو نتذكر الانتفاضه الاولى ببعدها الشعبي... لما طلعّنا وتحرّكنا وغيّرنا، خلينا نتذكر كمان الهند وغاندي وإفريقيا ومانديلا...
في فرصة قدامنا... تعالو نتجمع وننسى خلافاتنا وشعبياً نتحدى احباب الانقسام و المستفيدين منو ونعلي صوتنا .... يا جماعة احنا اصحاب الحق و قضيتنا اقدس قضية .
مطلبنا ...اخراج كل الاسرى السياسيين , كل المعتقلين اخوتنا مناضلين حماس و اخوتنا مناضلين فتح و كل مسجون لانو ابن فصيل لازم يطلع , عشان نفكر كيف نطلع اسرانا من سجون الاحتلال ايد وحدة .
نحن الشباب بنطلب حل جذري لا جزئي للوضع الراهن، ببدأ بمطالبة واضحة بإجراء انتخابات مجلس وطني جديد لمنظمة التحرير الفلسطينية , بستند لآليات انتخاب جديدة تضمن مشاركة كافة أجزاء الشعب الفلسطيني حول العالم (الضفة الغربية وقطاع غزة، فلسطينيو الداخل، اللاجئين، وفلسطينيو الشتات)
وقف كافة اشكال الحملات الاعلامية من الطرفين
استقالة حكومتي هنية وفياض للتمهيد لحكومة وحدة وطنية متفق عليها من كافة الفصائل الفلسطينية باختلاف الوانها
الاعلان او التاكيد علي وقف وتجميد المفاوضات بشكل كامل لحين التوافق علي تشكيل منظمة التحرير والمجلس الوطني ومن ثم يتخذوا قرارا جماعيا بذلك
اجراء انتخابات رئاسية وتشريعية متزامنة في وقت تختاره جميع الفصائل
هاي المطالب حق و مستحيل نتخلى عنو حتى لو كلفنا حياتنا
سياسياً... و اهدافنا اللي لازم الحكومة اللي بتمثلنا تتمسك فيها واضحة وبنأكد على...
• إنهاء الفساد والعمل على الاصلاح السياسي والاقتصادي
• وقف التنسيق الامني بكافة اشكاله في جميع محافظات الوطن
• انهاء الحصار و اعمار غزة هاشم وفتح المعابر
• الحفاظ على الثوابت لا للتفريط .
• انتخابات حرة ونزيهة .
• اقتصاد حر مستقل يضمن حياة كريمة لإلنا كلنا غير تابعين لاحد
• تعزيز مبدا الشفافية والمحاسبة لانه البلد إلي والك والنا كلنا
و من ثم العمل على انهاء الاحتلال بالتعاون مع الدول العربية الشقيقة الحرة و ضمان :
• دولة فلسطينية كاملة السيادة , لا يحق لبلفور و لا غيرو يعطو فلسطين لحدا
• حق العودة والتعويض للاجئين عن سنين اللجوء
• حق تقرير المصير و احنا قررنا انكون احرار في بلدنا
• الافراج عن كافة الاسرى العرب والفلسطينين من سجون الاحتلال.
• تعويض الفلسطينيين عن سنين الاحتلال.
اللي مش عقد المسؤولية ما ينزل عالانتخابات .
لابد ان نتفق ، لابد ان نجتمع، لابد ان نتوحد من أجل كل فلسطيني هنا وهناك وفي كل مكان، فمازال ستة ملايين فلسطيني يحلمون بالعودة الي ديارهم التي سلبها احتلال لا يفهم الا لغة القوة ! فلنكن اقوياء ومصدر قوتنا هو توحدنا واجماعنا علي قيادة موحدة تستطيع ان تقودنا الي بر الأمان بكل عزة وكرامة
أخلاقياتنا وقيمنا .... مش مستوردينها هي جزء اصيل فينا
• حرية ... عدالة.... ديمقراطية
• اختلافنا لا يعني خلافنا
• الايمان المطلق بالقدرة على التغيير
• احميني ...بحميك ....بنحمي وطننا
شو اسلوب حراكنا ...
• هي تحرك شعبي وطني ديمقراطي
• بدنا نعتمد على ذاتنا وعلى اهلنا انه يمدونا باحتياجاتنا... وما بدنا تمويل
• تنظيمنا ميداني... وبيننا حوار دائم لنطور اسلوبنا ونعمم نشاطنا ودايما في تواصل
هتافاتنا ... و كلنا ما بنختلف عليها شو ما كنا ووين ما كنا
الشــــــعــب يـــريـــــد بــــنـــــــــــاء الـــنـــظـــــــــام
الشـــــعـــب يــــريــــد انـــــــــهــــاء الانــــــقـــســام
من غزة صدر القرار موعدنا في نص اذار
من الضفة صدر القرار موعدنا في 15 اذار
يا عباس ويا هنية بدنا وحدة وطنية
يا أسير أكتب عالزنزانة .. الإنقسام عار وخيانة
أقهر يا وطني المحتل .. غير الوحدة ما فيه حل
يا مستعمر وينك وينك ............ وحدتنا رح تقلع عينك
كل الضفة والقطاع ................... وحدة وحدة بالإجماع
يا انقسام يا مسعور ................. انصرف عنا يلا غور
يا عباس و يا هنية ............. بددنا وحدة وطنية
ما بدنا خبز ولا ميه ..........بدنا وحدة وطنية
يا هنيو و يا عباس .......الشعب هو الاساس
الاعتقالات ليش ليش .... و احنا تحت رصاص الجيش
ارجمونا يا قادات .........بكفينا انقسامات
من الضفة لغزة......... بدنا كرامة و العزة
شعبي قرر لا استسلام ...........لا احتلال ولا انقسام
مش حنخاف مش حنطاطي................ احنا كرهنا الصوت الواطي
وحدة قيادة.... وحدة قرار .....وحدة نضال .... وحدة خيار
مش حنام مش حنام ..............غير لما ننهى الإنقسام
يا اسرائيل يا اسرائيل رح نتوحد مافي بديل
يا مستعمر وينك وينك ............ وحدتنا رح تقلع عينك
كلمة وحدة مش تنتين
شعب واحد مش شعبين
لا تسمع للقيل و قال
بدنا ننهي الاحتلال
يا محمد و يا جوزيف
تسقط العنصرية
بالكلمة لا مو بالسيف
بدنا الوحدة الوطنية
اذا قام احد الفصائل بالهتاف ماذا نرد عليه
لا فتح ولا حماس وحدتنا هي الاساس
واحد واحد واحد .. الشعب كلو واحد
ما بنحيد و ما بنلين .... وحدتنا هي فلسطين
كلمة وحدة مش تنتين
شعب واحد مش شعبين
وحدة شعبك يا فلسطين
شوكة بحلق المحتلين
مع فتح و مع حماس بدنا الوحدة بالاساس
كيف بدنا نتحرك...
• نبدأ بمسيرات شعبية يوم 15 اذار نظهر فيها غضبنا من الانقسام الذي وصل مرحلة الاقتتال و نعتصم حتلى تحقيق كافة المطالب
• ممنوع الانضمام الينا و انت تحمل أي نوع من انواع الاسلحه قطعيا و اذا تبين انو واحد معو سلاح راح نسلمو للاجهزة و نتابع لحتى يوخد عقابو .
• ما بدنا اي علم إلا علمنا علم فلسطين
• رح ننصب خيمنا و نضل فيها
• رح نعمل اذاعة للاعتصام نشغل فيها الاغاني الوطنية اللي ما الها لون حزبي
• رح نستخدم الطناجر والمعالق للتطبيل بالليل
• لما نتعب رح نستخدم الصفارات
• مش مروحين حتى تتصفى القلوب و ما بدنا مصالحة عشان اقتسام السلطة .
• جذب وسائل الاعلام الدولية والمحلية .
• الميكروفونات والصوت الواحد لكل الحشود , الهتاف جماعي .
من وين بدنا نبدا... يعني وين المسيرة بدها تكون و الاعتصام ؟المسيرات ستنطلق من :
غزة : ساحة الجندي المجهول .
رام الله: دوار المنارة .
طولكرم: دوار جمال عبدالناصر
رفح: دوار العودة
قلقيلية : ميدان ابو علي اياد
سلفيت: دوار سلفيت , بجانب القدس المفتوحة
خان يونس أمام القلعة
طوباس : طوباس ميدان الشهداء
اريحا : دوار اريحا .
جنين: مجمع الكراجات القديم القريب من سينما جنين
الخليل: امام مسجد الحسين في عين سارة
بيت لحم: ساحة كنيسة المهد
نابلس: ميدان الشهداء و الدوار
كل العالم: امام السفارة الفلسطينية او الممثلية الفلسطينية في تلك البلدشو لازم يكون معنا عشان الاعتصام ...
• علم فلسطين عشان نرفعو .
• طنجرة المنيوم يمكن إستخدامها بالاصوات،
• صفارة بلاستيكية.
•• خيمة فردية و (sleeping bag)للي بقدر يجيب .
• شنتة ظهر عشان نحط هالاغراض فيها .
أدوات أخرى
• عدة إسعافات أولية للي بقدر يجيب .
رسالة الى قوات الامن الفلسطينية في الضفة و غزة :ان التحرك الشبابي الضاغط على السياسيين يكون مخرج بماء الوجه للسياسيين من الالتزامات التي ألزموها أنفسهم وإنزالا لهم عن شجر اعتلوها ولا يجدو المخرج له , فلا غرو من التنازل لصالح أخيك الفلسطيني تحت ضغط شعبي لذلك نرجو من السلطات عدم قمع الشباب وجعل حلمهم يتحقق في توحيد الشعب الفلسطيني ,كي نعود نحمل الهم الواحد والهدف الواحد ألا هو مجابهة هذا الاحتلال الغاشم والذي لا يرقب فينا إلا ولا ذمة , وحتى تبدأ المرحلة الجديدة .
تعليمات :
نحمي مسيراتنا ومانسمح لحد يغير مسار المسيرات .
نعمم ممنوع الاقتراب من المحال ممنوع التكسير ممنوع التخريب لان في بعض الاشخاص محضرين حالهم للتخريب .
احترام أي شخص موجود في المسيرة أي مشكلة بتصير ما بنتجمع عليها لا بنحاول نمسك الطرفين و نسلمهم للشرطة .
اوعى اوعى اوعى تحمل علم غير علم فلسطين او تحمل سلاح .
لازم كلنا في المسيرة و الاعتصام نكون زي الاخوة و الاصحاب و نناقش بعض عن هموم هالبلد و نطلع بمطالب ممكن تفيد الحكومة اللي بدها تتشكل في التخطيط .
و طبعا ما بننسى .... الميثاق الوطني الفلسطيني:المادة الأولى: فلسطين وطن الشعب العربي الفلسطيني وهي جزء لا يتجزأ من الوطن العربي الكبير والشعب الفلسطيني جزء من الأمة العربية .
المادة الثانية: فلسطين بحدودها التي كانت قائمة في عهد الانتداب البريطاني وحدة إقليمية لا تتجزأ .
المادة الثالثة: الشعب العربي الفلسطيني هو صاحب الحق الشرعي في وطنه ويقرر مصيره بعد أن يتم
تحرير وطنه وفق مشيئته وبمحض إرادته واختياره
_________________________________
و هيك عرفت ليش نازلين عالشارع ب 15 اذار .....
انا نازل اطالب بحقوقي .............. و انت ؟
ــــــــــــــــــــــــــــــــــــــــــــــــــــــــــــــــــــــــ
الحراك الشعبي لانهاء الانقسام
الحملة الوطنية لانهاء الانقسام
اتحاد جروبات انهاء الانقاسم على الفيس بوك
منظمة شباب الوحدة الوطنية على الفيس بوك
كان هذا بيان شباب 15 مارس الـ(3).
